【魔術表演九大種類，你點可以唔知？】

想搵魔術表演又唔知咩表演適合乜嘢場合？

變吓啤牌又叫魔術表演，變吓銀紙又叫魔術表演，切開成個人一份一份又叫魔術。咁到底魔術可以分幾多類呢？又點樣可以揀到啱自己嘅魔術表演呢？其實魔術嘅類型可以依照演出嘅場地、風格同埋使用道具嘅大細分為下列九大種類。

第一種: 近景魔術

第二種: 啤牌魔術

第三種: 硬幣魔術

第四種: 街頭魔術

第五種: 鏡頭魔術

第六種: 舞台魔術

第七種: 心靈預言魔術

第八種: 逃脫魔術

第九種: 大型幻術

我哋會喺下面遂一介紹唔同種類嘅魔術。

第一種: 近景魔術

註釋：又叫「近距離魔術」，一般魔術師距離觀眾都唔超過三公尺，通常表演者會坐喺一張細檯面前表演，因此又叫做餐桌魔術（Table magic）。

近景魔術，佢屬於與觀眾互動性比較強嘅魔術，對細節、手法嘅要求都比較高，因為要同觀眾面對面接觸，觀眾又可以觸摸表演物，往往帶嚟極大嘅震撼性都係因為觀眾能夠親自接觸過表演嘅道具。常見嘅身邊物品都可以用來表演：例如飲管、硬幣、橡筋、刀叉、銀紙….等。

第二種: 啤牌魔術

註釋：基本上利用唔同手法花式洗牌，例如：（開扇、雙手／單手切牌、飛牌、紙牌破壞或復原、懸浮等等）再加上讀心術或者係手法做啤牌魔術如：（預言／估牌／瞬間移動等等）都係魔術師常見嘅變牌魔術。

啤牌魔術可以話係從近景魔術中自成一格嘅魔術類別，啤牌為基本道具之一。但係啤牌表演嘅節目又可以變幻無窮，有唔少優秀嘅魔術師更加用啤牌魔術打出名堂。

第三種: 硬幣魔術

註釋：硬幣魔術相比啤牌魔術更講求魔術師本身嘅功力！點解咁講呢？因為愈簡單嘅嘢其實先係愈難做！硬幣魔術唔似得啤牌魔術咁可以利用錯覺／數字原理等手法去完成，而係硬橋硬碼嘅真功夫！所以一般見到新手入門都係從啤牌開始就係咁解啦。

簡單嘅硬幣魔術，都係經過千錘百鍊雕琢而成的。

第四種: 街頭魔術

註釋：街頭魔術俾人感覺就係喺街玩就叫街頭魔術。其實街頭魔術，係一種傳統表演手法，亦都係街頭藝術嘅一種。多數會喺街頭隨機搵路人做觀眾並且喺佢哋面前表演同互動。可能同上面幾種有類似嘅感覺，不過形式上都係有分別嘅。

第五種: 鏡頭魔術

註釋：多數嘅情況係喺有限嘅角度表演，有部份嘅魔術未必可以滿足到360° 嘅觀眾，所以鏡頭魔術成為咗一種可以集中喺鏡頭面前表演，震驚屏幕背後嘅你。

仲可以同客戶拜年添！

第六種: 舞台魔術

註釋：基本上舞台魔術係魔術師SOLO 嘅地方。配上現場音樂變鴿、變兔仔、變花、變火等等。每個魔術師都會有自己嘅套路，有唔同嘅風格同流程。就算對住小朋友至大人。10幾人到幾百人都非常適合安排舞台表演。

第七種: 心靈預言魔術

註釋：心靈預言魔術，簡單嚟講就係讀心術、透視、預言等超能力類的魔術。相對上面嘅魔術表演更加需要魔術師擁有大量嘅經驗同知識。包括：暗示技巧、催眠等。呢類型魔術多數都俾人一種比較神秘嘅感覺。

第八種: 逃脫魔術

註釋：逃脫魔術比起其餘類型嘅魔術都比較刺激同精彩。因為呢類型嘅魔術相對都會比較有危險性。一般嚟講都會加上危險嘅元素。例如：手銬、繩索、刀片、釘、水牢或引火等等。

第九種: 大型幻術

註釋：大型幻象俾人第一印象都會係大衛高柏菲穿越長城，變走自由女神之類。但其實要定義大型幻象可以包括刀鋸美人、移形換影、人體切割、觀眾漂浮等等。

通常大型幻術演出，都會需要多名幕後的工作人員配合，再加上多次嘅演練彩排。大型幻術除咗魔術師精彩嘅表演之外，多數都會有個美女助理幫忙，亦都令表演加分不少!